Studentët e artit hyjnë në shkolla — çfarë ndryshimesh priten?

Në ambientet e Universitetit të Arteve u mbledhën studentë të ciklit master nga tre fakultete.

Studentët e pranishëm do të kryejnë praktika mësimore në shkollat parauniversitare, duke mbështetur programin Pas Shkolle të Ministrisë së Arsimit.

Bashkëpunimi synon t’i bashkojë njohuritë universitare me përvojën profesionale, dhe të kontribuojë në formimin e mësuesve të kualifikuar në artet skenike, pamore e muzikore në sistemin arsimor.

Përmes angazhimit në orët praktike të artit dhe zejeve, si dhe në festivale korale e teatrore në shkolla, studentët synojnë të sjellin qasje kreative, energji të rinovuar dhe metoda mësimore më bashkëkohore.

Universiteti e përshkroi nismën si një lidhje të fortë mes institucioneve arsimore, me qëllim përmirësimin e cilësisë së trajnimit për brezat e ardhshëm.